Maqam-e-hosh Se Guzra Makaan Se La-makaan Pahuncha

Maqam-e-hosh se guzra makaan se la-makaan pahuncha,

Tumhaare ishq mein deewana-e-manzil kahaan pahuncha.!

Nazar ki manzilon mein bas tumhin husn-e-mujassam the,

Mata-e-aarzu le kar main ulfat mein jahaan pahuncha.!

Usi ne ishq ban kar do-jahaan ko phoonk daala hai,

Wo shoala jo teri nazron se dil ke darmiyaan pahuncha.!

Junoon zaahir hua rukh par khudi par be-khudi chhaai,

Ba-qaid-e-hosh main jab bhi qareeb-e-aastaan pahuncha..

Tum apni justuju mein ye mera shauq-e-talab dekho,

Tumhaare ishq mein lut kar bhi tum tak jaan-e-jaan pahuncha.!

Ta'alluq tod kar jaan-e-jahaan saare zamane se,

Main pahuncha tha jahaan mujh ko teri khaatir wahaan pahuncha.!

'Fana' wo jalwa-gar hone lage har bazm-e-imaan mein,

Mera dil le ke jab mujh ko sar-e-ku-e-butaa'n pahuncha.!!

"Fana Bulandshahri"
__________

Husn-e-mujassam = beauty incarnate,
Sar-e-ku-e-butaa'n = towards the lover's street,