Kya Zauq Hai, Kya Shauq Hai So Martaba Dekha

Kya Zauq Hai, Kya Shauq Hai So Martaba Dekha,
Phir Bhi Ye Kahun Jalwaa-e-janaa'n Nahi Dekha,

Mahshar Main Wo Naadim Hon Khuda Ye Na Dikhaye,
Aankhon Ne Kabhi Is Ko Pashemaa'n Nahi Dekha,

Har Chand Tere Zulm Ki Kuch Hadd Nahi Zaalim,
Par Hum Ne Kisi Shakhs Ko Nalaa'n Nahi Dekha,

Milta Nahi Hum Ko Dil-e-gumshuda Humara,
Tu Ne Kahin Ai Ghum-e-janaa'n Nahi Dekha?.

Lo Aur Suno Kahte Hain Wo Dekh Ke Mujh Ko,
Jo Haal Suna Tha Wo Pareshaa'n Nahin Dekha,

Kya Pochte Ho Kaun Hai Ye Kis Ki Hai Shohrat,
Kya Tum Ne Kabhi 'Dagh' Ka Deewaa'n Nahin Dekha.!!

"Dagh Dehlvi"