Kya Baat Hai Ai Jaan-e-sukhan Baat Kiye Ja

Kya baat hai ai jaan-e-sukhan baat kiye ja,
Mahaul pe naghmaat ki barsaat kiye ja,

Duniya ki nigahon mein badi hirs bhari hai,
Na-ahl zamane se hijabaat kiye ja,

Neki ka irada hai to phir poochhna kaisa,
Din raat faqeeron ki mudaraat kiye ja,

Chalte rahein mad'hosh piyaalon ki rawish par,
Nadaan sitaron ko hidayaat kiye ja,

Allah tera husn kare aur zyaada,
Hum rah-nashinon se mulaqaat kiye ja,

Ban aaye jawabaat to mil jayenge khud hi,
Ai daawar-e-mahshar tu sawalaat kiye ja,

Hasti o adam kya hain ba-juz jumbish-e-abru,
Ai jaan-e-kinayat ishaaraat kiye ja,

Kahta hai 'Adam' mujh ko har ek gosha-e-hasti,
Aaya hai to kuchh sair-e-kharabaat kiye ja.!!

"Abdul Hameed Adam"

__________

Hirs = greed, ambition,
Na-ahl = incapable, unfit, unworthy,
Mudaraat = politeness, courtesy, hospitality,
Rawish = pathway/manners,
Hidayaat = directions,
Rah-nashinon = people sitting on the way,
Daawar-e-mahshar = the judge presiding on the day of judgement,
Adam = nonexistence, negation, nothing, life after death,
Ba-juz = except, beside,
Jumbish-e-abru = movement ; signal; innuendo; of brow,