Kab thehrega dard ai dil kab raat basar hogi,
Sunte the wo aayenge sunte the sahar hogi,
Kab jaan lahu hogi kab ashk gauhar hoga,
Kis din teri sunwaai ai deeda-e-tar hogi,
Kab mahkegi fasl-e-gul kab bahkega may-khana,
Kab subah-e-sukhan hogi kab shaam-e-nazar hogi,
Waaiz hai na zahid hai naaseh hai na qaatil hai,
Ab shahar mein yaaron ki kis tarah basar hogi,
Kab tak abhi raah dekhein ai qaamat-e-jaanana,
Kab hashr mu'ayyan hai tujh ko to khabar hogi..!!
"Faiz Ahmad Faiz"
__________
Sunwaai = hearing,
Qaamat-e-jaanana = beloved's stature/ height,
Mu'ayyan = established, fixed, appointed, certified
definitely,
No comments:
Post a Comment