Jo Khyaal The Na Qayaas The Wahi Log Mujh Se Bichhad Gaye

Jo khyaal the na qayaas the wahi log mujh se bichhad gaye,
Jo mohabbaton ki asaas the wahi log mujh se bichhad gaye,

Jinhein maanta hi nahin ye dil wahi log mere hain hum-safar,
Mujhe har tarah se jo raas the wahi log mujh se bichhad gaye,

Mujhe lamha-bhar ki rafaqaton ke saraab aur satayenge,
Meri umr-bhar ki jo pyaas the wahi log mujh se bichhad gaye,

Ye khyaal saare hain aarzi ye gulaab saare hain kaaghzi,
Gul-e-aarzu ki jo baas the wahi log mujh se bichhad gaye,

Jinhein kar saka na qubool main wo shareek-e-rah-e-safar hue,
Jo meri talab meri aas the wahi log mujh se bichhad gaye,

Meri dhadkanon ke qareeb the meri chaah the mera khwaab the,
Wo jo roz-o-shab mere paas the wahi log mujh se bichhad gaye.!!

"Aitebaar Sajid"