Jo Din Tha Ek Musibat To Raat Bhaari Thi

Jo din tha ek musibat to raat bhaari thi,
Guzaarni thi magar zindagi, guzaari thi,

Sawaad-e-shauq mein aise bhi kuchh maqaam aaye,
Na mujh ko apni khabar thi na kuchh tumhaari thi,

Larazte haathon se deewar lipti jaati thi,
Na poochh kis tarah tasveer wo utaari thi,

Jo pyaar hum ne kiya tha wo karobaar na tha,
Na tum ne jeeti ye baazi na main ne haari thi,

Tawaaf karte the us ka bahaar ke manzar,
Jo dil ki sej pe utri ajab sawaari thi,

Tumhaara aana bhi achchha nahin laga mujh ko,
Fasurdagi si ajab aaj dil pe taari thi,

Kisi bhi zulm pe koi bhi kuchh na kahta tha,
Na jaane kaun si jaan thi jo itni pyaari thi,

Hujoom badhta chala jaata tha sar-e-mahfil,
Bade rasaan se qaatil ki mashq jaari thi,

Tamasha dekhne waalon ko kaun batlata,
Ke is ke baad inhi mein kisi ki baari thi,

Wo is tarah tha mere baazuon ke halqe mein,
Na dil ko chain tha 'Amjad' na be-qaraari thi.!!

"Amjad Islam Amjad"
___
Sawaad-e-shauq = taste , relishing; taste, relish, flavour, savour; sweetness; enjoyment, pleasure of love,
Rasaan = gentleness, slowly,
Mashq = exercise, practice,
Halqe = chains,