Ek Aazaar Hui Jaati Hai Shohrat Hum Ko

Ek aazaar hui jaati hai shohrat hum ko,
Khud se milne ki bhi milti nahin fursat hum ko,

Raushni ka ye musafir hai rah-e-jaan ka nahin,
Apne saaye se bhi hone lagi wahshat hum ko,

Aankh ab kis se tahayyur ka tamasha maange,
Apne hone pe bhi hoti nahin hairat hum ko,

Ab ke ummeed ke shole se bhi aankhein na jali'n,
Jaane kis mod pe le aai mohabbat hum ko,

Kaun si rut hai zamane mein humein kya maloom,
Apne daaman mein liye phirti hai hasrat hum ko,

Zakhm ye wasl ke marham se bhi shayad na bhare,
Hijr mein aisi mili ab ke masafat hum ko,

Daagh-e-isyaa'n to kisi taur na chhupte 'Amjad',
Dhaanp leti na agar chaadar-e-rahmat hum ko.!!

"Amjad Islam Amjad"
___
Aazaar = illness, torment, pain, suffering,
Tahayyur = amazement, astonishment,
Daagh-e-isyaa'n = stain of sin,