Hawa Sanke To Khaaro'n Ko Badi Takleef Hoti Hai

Hawa sanke to khaaro'n ko badi takleef hoti hai,
Mere ghum ki bahaaron ko badi takleef hoti hai..

Na chhed ai hum-nashin ab zeest ke mayoos naghmo'n ko,
Ke ab barbat ke taaro'n ko badi takleef hoti hai..

Mujhe ai kasrat-e-aalaam bas itni shikayat hai,
Ke mere ghum-gusaaron ko badi takleef hoti hai..

Kaho maujo'n se lahra kar na yun paltein samandar se,
Ke ba-ghairat kinaaron ko badi takleef hoti hai..

Gale milte hain jab aapas mein do bichhde hue saathi,
'Adam' hum be-sahaaron ko badi takleef hoti hai..!!

"Abdul Hameed Adam"