Falak se chaand sitaaron se jaam lena hai,
Mujhe sahar se nayi ek shaam lena hai,
Kise khabar ke farishte ghazal samajhte hain,
Khuda ke saamne kaafir ka naam lena hai,
Muaamla hai tera badtareen dushman se,
Mere azeez mohabbat se kaam lena hai,
Mahakti zulfon se khushbu chamakti aankh se dhoop,
Shabo'n se jaam-e-sahar ka salaam lena hai,
Tumhaari chaal ki aahistagi ke lahje mein,
Sukhan se dil ko masalne ka kaam lena hai,
Nahin main 'Meer' ke dar par kabhi nahin jaata,
Mujhe khuda se ghazal ka kalaam lena hai,
Bade saleeqe se noto'n mein us ko tulwa kar,
Ameer-e-shahar se ab intiqaam lena hai..!!
"Basheer Badr"
No comments:
Post a Comment