Duniya ke sitam yaad na apni hi wafa yaad,
Ab mujh ko nahin kuchh bhi mohabbat ke siwa yaad,
Main shikwa ba-lab tha mujhe ye bhi na raha yaad,
Shayad ke mere bhoolne waale ne kiya yaad,
Chheda tha jise pahle-pahal teri nazar ne,
Ab tak hai wo ek naghma-e-be-saaz-o-sada yaad,
Jab koi haseen hota hai sargarm-e-nawazish,
Us waqt wo kuchh aur bhi aate hain siwa yaad,
Kya jaaniye kya ho gaya arbaab-e-junoon ko,
Marne ki ada yaad na jeene ki ada yaad,
Muddat hui ek haadsa-e-ishq ko lekin,
Ab tak hai tere dil ke dhadakne ki sada yaad,
Haan haan tujhe kya kaam meri shiddat-e-ghum se,
Haan haan nahin mujh ko tere daaman ki hawa yaad,
Main tark-e-rah-o-rasm-e-junoon kar hi chuka tha,
Kyun aa gayi aise mein teri laghzish-e-pa yaad,
Kya lutf ke main apna pata aap bataaun,
Kijiye koi bhooli hui khaas apni ada yaad.!!
"Jigar Muradabadi"
No comments:
Post a Comment