Dasht-e-dil Mein Saraab Taaza Hain

Dasht-e-dil mein saraab taaza hain,
Bujh chuki aankh khwaab taaza hain,

Dastaan-e-shikast-e-dil hai wahi,
Ek do chaar baab taaza hain,

Koi mausam ho dil-gulistaan mein,
Aarzu ke gulaab taaza hain,

Dosti ki zabaan hui matrook,
Nafraton ke nisaab taaza hain,

Aagahi ke humari aankhon par,
Jis qadar hain azaab taaza hain,

Zakhm-dar-zakhm dil ke khaate mein,
Doston ke hisaab taaza hain,

Sar pe boodhi zameen ke 'Amjad',
Ab ke ye aaftaab taaza hain..!!

"Amjad Islam Amjad"
___
Saraab = mirage/ illusion,
Matrook = obsolete, rejected, abolished,
Nisaab = what is fixed or established course, Capital, curriculum, syllabus,
Aagahi = awareness,