Chalne Ka Hausla Nahin Rukna Muhaal Kar Diya

Chalne ka hauslaa nahin rukna 
muhaal kar diya,
Ishq ke iss safar ne to mujh ko 
nidhaal kar diya,

Ae meri gul-zameen tujhe chaah thi 
ek kitaab ki,
Ehl-e-kitaab ne magar kya tera 
haal kar diya,

Milte huye dilon ke beech aur tha 
faasla koi,
Uss ne magar bichhadte waqt aur 
sawaal kar diya,

Ab ke hawa ke saath hai 
daaman-e-yaar muntazir, 
Baanu-e-shab ke haath mai rakhna 
sambhaal kar diya,

Mumkinaa faislon main ek hijr ka 
faislaa bhi tha,
Hum ne to ek baat ki uss ne 
kamaal kar diya,

Mere labon pe mohr thi pr mere 
sheesha-ru ne to,
Sheher ke sheher ko mera 
waaqif-e-haal kar diya,

Chehera-o-naam ek saath aaj na 
yaad aa sake,
Waqt ne kis shabeeh ko 
khwaab-o-khyaal kar diya,

Mudatton baad us ne aaj mujh se 
koi gilaa kiya,
Mansab-e-dilbari pe kya mujh ko 
bahaal kar diya..

- Parween Shakir 
___
sheesha-ru = like glass, 
waaqif-e-haal = connoisseur 
Mansab-e-dilbari = stage of loving
Baanu-e-shab = shoulders of night,