Akele hain wo aur jhunjhla rahe hain,
Meri yaad se jang farma rahe hain,
Ye kaisi hawa-e-taraqqi chali hai,
Diye to diye dil bujhe ja rahe hain,
Ilaahi mere dost hon khairiyat se,
Ye kyun ghar mein patthar nahin aa rahe hain,
Bahisht-e-tasawwur ke jalwe hain main hun,
Judaai salamat maze aa rahe hain,
Qayamat ke aane mein rindon ko shak tha,
Jo dekha to waa'iz chale aa rahe hain,
Bahaaron mein bhi may se parhez tauba,
'Khumar' aap kaafir hue ja rahe hain.!!
"Khumar Barabankawi"
No comments:
Post a Comment