Ahtiraam-e-lab-o-rukhsaar Tak Aa Pahunche Hain

Ahtiraam-e-lab-o-rukhsaar tak aa pahunche hain,
Bul-hawas bhi mere me'aar tak aa pahunche hain,

Jo haqa'iq the wo ashkon se hum-aaghosh hue,
Jo fasane the wo sarkaar tak aa pahunche hain,

Kya wo nazron ko jharokhe mein muallaq kar dein,
Jo tere saya-e-deewar tak aa pahunche hain,

Apni taqdeer ko rote rahein saahil waale,
Jin ko aana tha wo manjdhaar tak aa pahunche hain,

Ab to khul jayega shayad teri ulfat ka bharam,
Ahl-e-dil jura't-e-izhaar tak aa pahunche hain,

Ek tum ho ke khuda ban ke chhupe baithe ho,
Ek hum hain ke lab-e-daar tak aa pahunche hain.!!

"Qateel Shifai"
___
Bul-hawas = slave of passions, very greedy, avaricious,
Me'aar = standard, yardstick, benchmark,
Haqa'iq = facts, realities,
Hum-aaghosh = embracing, locked in each other's arms,
Muallaq = suspended, pending, hanging,