Ab ikhtiyaar mein maujein na ye rawani hai,
Main bah raha hun ke mera wajood paani hai...
Main aur meri tarah tu bhi ek haqeeqat hai,
Phir is ke baad jo bachta hai wo kahani hai...
Tere wajood mein kuchh hai jo is zameen ka nahin,
Tere khyaal ki rangat bhi aasmaani hai...
Zara bhi dakhl nahin is mein in hawaon ka,
Humein to maslahatan apni khaak udaani hai...
Ye khwab-gah ye aankhein ye mera ishq-e-qadeem,
Har ek cheez meri zaat mein puraani hai...
Wo ek din jo tujhe sochne mein guzra tha,
Tamaam umr usi din ki tarjumaani hai...
Nawah-e-jaan mein bhatakti hain khushbuein jis ki,
Wo ek phool ke lagta hai raat-raani hai...
Iradatan to kahin kuchh nahin hua lekin,
Main ji raha hun ye saanson ki khush-gumaani hai.!!
"Abhishek Shukla"
No comments:
Post a Comment