Aaye Kuchh Abr Kuchh Sharaab Aaye

Aaye kuchh abr kuchh sharaab aaye,
Is ke baad aaye jo azaab aaye,

Baam-e-meena se mahtab utre,
Dast-e-saaqi mein aaftab aaye,

Har rag-e-khoon mein phir charaghaan ho,
Saamne phir wo be-naqaab aaye,

Umr ke har waraq pe dil ki nazar,
Teri mehr-o-wafa ke baab aaye,

Kar raha tha ghum-e-jahaan ka hisaab,
Aaj tum yaad be-hisaab aaye,

Na gai tere ghum ki sardaari,
Dil mein yun roz inqalaab aaye,

Jal uthe bazm-e-ghair ke dar-o-baam,
Jab bhi hum khanuma'n-kharaab aaye,

Is tarah apni khamushi goonji,
Goya har samt se jawaab aaye,

'Faiz' thi raah sar-ba-sar manzil,
Hum jahaan pahunche kaamyab aaye.!!

"Faiz Ahmad Faiz"
_____

Baam-e-meena = terrace of the wine decanter,
Khanuma'n-kharaab = wretched/ anguished/ broken hearted,