Aankhon Mein Bas Ke Dil Mein Sama Kar Chale Gaye

Aankhon mein bas ke dil mein sama kar chale gaye,
Khwabida zindagi thi jaga kar chale gaye,

Husn-e-azal ki shaan dikha kar chale gaye,
Ek waaqia sa yaad dila kar chale gaye,

Chehre tak aastin wo la kar chale gaye,
Kya raaz tha ke jis ko chhupa kar chale gaye,

Rag rag mein is tarah wo sama kar chale gaye,
Jaise mujhi ko mujh se chura kar chale gaye,

Meri hayat-e-ishq ko de kar junoon-e-shauq,
Mujh ko tamaam hosh bana kar chale gaye,

Samjha ke pastiyaan mere auj-e-kamaal ki,
Apni bulandiyaan wo dikha kar chale gaye,

Apne farogh-e-husn ki dikhla ke wus'atein,
Mere hudood-e-shauq badha kar chale gaye,

Har shai ko meri khaatir-e-nashaad ke liye,
Aaina-e-jamaal bana kar chale gaye,

Aaye the dil ki pyas bujhaane ke waaste,
Ek aag si wo aur laga kar chale gaye,

Aaye the chashm-e-shauq ki hasrat nikaalne,
Sar-ta-qadam nigaah bana kar chale gaye,

Ab karobaar-e-ishq se fursat mujhe kahaan,
Kaunain ka wo dard badha kar chale gaye,

Shukr-e-karam ke saath ye shikwa bhi ho qubool,
Apna sa kyun na mujh ko bana kar chale gaye,

Lab tharthara ke rah gaye lekin wo ai 'Jigar'
Jaate hue nigaah mila kar chale gaye..!!

"Jigar Muradabadi"