Zaalim Buto'n Se Aankh Lagaai Na Jayegi

Zaalim buto'n se aankh lagaai na jayegi,
Patthar ki chot dil se uthaai na jagegi,

Hone do ho rahe hain jo ulfat ke tazkire,
Bigdoge tum to baat banaai na jayegi,

Kah do ye shama se ki abas tu hai ashk-baar,
Paani se dil ki aag bujhaai na jayegi,

Chilman ho ya naqaab ho ya parda-e-haya,
Soorat teri kisi se chhupaai na jayegi,

Mumkin hai teer-e-naaz se dil ko bacha bhi loon,
Lekin nazar ki chot bachaai na jayegi,

Aankhein khuda ne di hain to dekhenge husn-e-yaar,
Kab tak naqaab rukh se uthaai na jayegi,

Tauba ko munh laga ke khajil hoge tum 'Jaleel',
Jaam o subu se aankh milaai na jayegi..!!

"Jaleel Manikpuri"
___
Abas = futile, profitless, purposeless,
Khajil = embarrass, sharmindagi,