Zakhm Kya Kya Na Zindagi Se Milay

Zakhm Kya Kya Na Zindagi Se Milay,
Khwaab Palko'n Se Be-Rukhi Se Milay...

Aap Ko Mil Gaye Hain Qismat Se,
Hum Zamanay Mein Kab Kisi Ko Milay.?.

Aisay Khushbuoo Se Mil Raha Hai Gulaab,
Jis Tarah Raat, Raushni Se Milay...

Hum Faqeero'n Se Dosti Hai Magar,
Us Se Kahna Ke Saadgi Se Milay...

Dil Mein Rakhtay Hain Ehtyaat Se Hum,
Zakhm Jo Jo Bhe Jis Kisi Se Milay...

Zindagi Se Galay Milay To Lagaa,
Ajnabi Jaisay Ajnabi Se Milay...

Us Ke Seenay Mein Dil Nahi Tha “Batool”
Hum Ne Socha Tha Aadmi Se Milay..!!

_ Fakhira Batool