Sar-e-sahra Musaafir Ko Sitaara Yaad Rahta Hai

Sar-e-sahra musaafir ko sitaara yaad rahta hai,
Main chalta hoon mujhe chehra tumhaara yaad rahta hai.!

Tumhaara zarf hai tum ko mohabbat bhool jaati hai,
Humein to jis ne hans kar bhi pukaara yaad rahta hai.!

Mohabbat mein jo dooba ho use saahil se kya lena,
Kise is bahr mein ja kar kinaara yaad rahta hai.!

Bahut lahron ko pakda doobne waale ke haathon ne,
Yahi bas ek dariya ka nazaara yaad rahta hai.!

Sadaa'en ek si yaksaaniyat mein doob jaati hain,
Zara sa mukhtalif jis ne pukaara yaad rahta hai.!

Main kis tezi se zinda hoon main ye to bhool jaata hoon,
Nahin aana hai duniya mein dobaara yaad rahta hai.!!

"Adeem Hashmi"
___
Yaksaaniyat = uniformity,

Rakht-e-safar Yunhi To Na Bekaar Le Chalo

Rakht-e-safar yunhi to na bekaar le chalo...
Rasta hai dhoop ka koi deewaar le chalo...

Taaqat nahin zabaan mein to likh hi lo dil ki baat...
Koi to saath soorat-e-izhaar le chalo...

Dekhun to wo badal ke bhala kaisa ho gaya...
Mujh ko bhi us ke saamne is baar le chalo...

Kab tak nadi ki tah mein utaaroge kashtiyan...
Ab ke to haath mein koi patwaar le chalo...

Padti hain dil pe ghum ki agar silwatein to kya...
Chehre pe to khushi ke kuchh aasaar le chalo...

Jitne bhanwar kahoge pahan lunga jism par...
Ek baar to nadi ke mujhe paar le chalo...

Kuchh bhi nahin agar to hatheli pe jaan sahi...
Tohfa koi to us ke liye yaar le chalo.!!

"Adeem Hashmi"
___
Rakht-e-safar = Things Needed On A Journey, goods of travel,

Raahat-e-jaan Se To Dil Ka Wabaal Achchha Hai

Raahat-e-jaan se to ye dil ka wabaal achchha hai...
Us ne poochha to hai itna tera haal achchha hai...

Maah achchha hai bahut hi na ye saal achchha hai...
Phir bhi har ek se kahta hoon ki haal achchha hai...

Tere aane se koi hosh rahe ya na rahe...
Ab talak to tere beemaar ka haal achchha hai...

Ye bhi mumkin hai teri baat hi ban jaye koi...
Use de de koi achchhi si misaal, achchha hai...

Daaen rukhsaar pe aatish ki chamak wajah-e-jamaal...
Baaen rukhsar ki aaghosh mein khaal achchha hai...

aao phir dil ke samandar ki taraf laut chalein...
Wahi paani wahi machhli wahi jaal achchha hai...

Koi dinaar na dirham na riyaal achchha hai...
Jo zaroorat mein ho maujood wo maal achchha hai...

Kyoon parakhte ho sawaalon se jawaabon ko 'Adeem'...
Honth achchhe ho'n to samjho ki sawaal achchha hai.!!

"Adeem Hashmi"
___
Khaal = Beauty spot, mole, तिल

Logon Ke Dard Apni Pashemaniyan Mili'n

Logon ke dard apni pashemaniyan mili'n,
Hum shaah-e-ghum the hum ko yahi raaniyan mili'n...

Sahrao'n mein bhi ja ke nazar aaye sail-e-aab,
Dariya se door bhi humein tughyaniyan mili'n...

Aaya na phir wo daur ke ji bhar ke kheliye,
Bachpan ke baad phir na wo nadaniyan mili'n...

Rah kar alag bhi saath raha hai koi khyaal,
Tanhaai mein bhi khud pe nigahbaniyan mili'n...

Paani ke saath aks bhi bah kar chale gaye,
Sookhi nadi to phir wahi viraaniyan mili'n...

Apni hi aankh par gaye lamho'n ka bojh tha,
Us ki nazar mein to wahi jaulaniyan mili'n...

Baitha raha huma-e-sitam sar pe hi 'Adeem',
Har dasht-e-karb ki humein sultaaniyan mili'n.!!

"Adeem Hashmi"
___
Sail-e-aab = storm of water, tears,
Tughyaniyan = storms,
Jaulaniyan = strutting, prances,

Kuchh Hijr Ke Mausam Ne Sataya Nahin Itna

Kuchh hijr ke mausam ne sataya nahin itna...
Kuchh hum ne tera sog manaya nahin itna...

Kuchh teri judaai ki aziyyat bhi kadi thi...
Kuchh dil ne bhi ghum tera manaya nahin itna...

Kyun sab ki tarah bheeg gai hain teri palkein...
Hum ne to tujhe haal sunaya nahin itna...

Kuchh roz se dil ne teri raahein nahin dekhin...
Kya baat hai tu yaad bhi aaya nahin itna...

Kya jaaniye is be-sar-o-saamaani-e-dil ne...
Pahle to kabhi hum ko rulaya nahin itna.!!

"Adeem Hashmi"

Dard Hote Hain Kayi Dil Mein Chhupane Ke Liye

Dard hote hain kayi dil mein chhupane ke liye...
Sab ke sab aansu nahin hote bahaane ke liye...

Umr tanha kaat di waada nibhaane ke liye...
Ahd baandha tha kisi ne aazmaane ke liye...

Ye qafas hai ghar ki zebaaish badhaane ke liye...
Ye parinde to nahin hain aashiyaane ke liye...

Kuchh diye deewaar par rakhne hain waqt-e-intezaar...
Kuchh diye laaya hoon palko'n par jalaane ke liye...

Wo ba-zaahir to mila tha ek lamhe ko 'Adeem'...
Umr saari chaahiye us ko bhulaane ke liye...

Log zer-e-khaak bhi to doob jaate hain 'Adeem'...
Ek samandar hi nahin hai doob jaane ke liye...

Tu pas-e-khanda-labi aaho'n ki aawazein to sun...
Ye hansi to aai hai aansu chhupane ke liye...

Koi ghum ho koi dukh ho dard koi ho 'Adeem'...
Muskurana pad hi jaata hai zamaane ke liye.!!

"Adeem Hashmi"

Chal Diya Wo Dekh Kar Pahloo Meri Taqseer Ka

Chal diya wo dekh kar pahloo meri taqseer ka...
Doosra rukh us ne dekha hi nahin tasweer ka...

Baaqi saare khat pe dhabbe aansuo'n ke rah gaye...
Ek hi jumla padha main ne teri tahreer ka...

Tu ne kaise lafz hontho'n ki kamaan mein kas liye...
Itna gahra ghaao to hota nahin hai teer ka...

Uzr baaqi chaal mein hai qaid go baaqi nahin...
Paao'n aadi ho gaya hai is qadar zanjeer ka...

Aa gai kashti bhatak kar aab se su-e-saraab...
Bhar gaya reg-e-rawaan se jal mahi'geer ka...

Baat chhoti to nahin tujh se bichhadne ki hai baat...
Faisla tasleem kar loon kis tarah taqdeer ka...

Yaar logo'n ne use katba bana daala 'Adeem'.. 
Aakhiri patthar bacha jo umr ki tameer ka...

Doston se bhi ta'alluq ban gaya hai wo 'Adeem'...
Jo ta'alluq hai kisi shamsheer se shamsheer ka...

Zahar ki aankho'n mein raushan suratein do hain 'Adeem'...
Shakl ek suqraat ki aur ek chehra heer ka.!!

"Adeem Hashmi"
___
Taqseer = error, crime, sin ग़लती, क़ुसूर,
Uzr = excuse, apology, plea,
Reg-e-rawaan = mirage, hallucination
flying sand,
Maahi'geer = fisherman,
Katba = epitaph,