Tum Se Waabasta Hai Meri Maut Meri Zindagi

Tum se waabasta hai meri maut meri zindagi,
Jism se apne kabhi saaya juda hota nahin..

Is tarah fariyaad karne ko kaleja chahiye,
Ab koi gulshan mein mera hum-nawa hota nahin..

Wo mohabbat-aafreen deta hai hasb-e-zarf-e-ishq,
Phir kisi se bhi talab-gaar-e-wafa hota nahin..

Ek takhayyul hai ke jis mein mahw hai mera dimaagh,
Ek tasawwur ye jo aankhon se juda hota nahin..

saii-e-fahm-e-zaat-e-baari aur ye mahdood aql,
Jis ka haasil kuchh bhi hairat ke siwa hota nahin..

Ashraf-ul-makhlooq kahte hain usi majboor ko,
Jis ka koi kaam be-dast-e-dua hota nahin..

Jitne armaan dil mein the 'Makhmoor' sab maujood hain,
Ek bhi to apne markaz se juda hota nahin.!!

"Makhmoor Dehlvi"