Wo Bichhda Hai To Yaad Aaya

* Nazm *
__________

Wo bichhda hai to yaad aaya..

Wo aksar mujh se kahta tha..

Mohabbat wo nahin hai jo ye nasl-e-nau samajhti hai,
Ye pahron phone par baatein,
Ye aaye din mulaqaatein,

Agar ye sab mohabbat hai,
To tuf aisi mohabbat par..

Mohabbat to mohabbat hai,
Wisaal o wasl ki khwahish se baala-tar..

Kaha karta,
Mohabbat qurb ki khwahish pe aaye to samajh lena,

Hawas ne sar uthaya hai..

Hawas kya hai,
Faqat jismon ki pamaali faqat tazleel roohon ki,

Kaha karta,
Mohabbat aur hoti hai..

Hawas kuchh aur hoti hai,

So jab bhi qurb ki khwahish pe aa jaaye mohabbat to,
Suno phir der mat karna wahin rasta badal lena..

Wo bichhda hai to yaad aaya.!!

"Meesam Ali Aagha"