Is Basti Ke Ek Kooche Mein

* Nazm *
__________

Is basti ke ek kooche mein ek 'Insha' naam ka deewana.!
Ek naar pe jaan ko haar gaya mashhoor hai us ka afsaana...

Us naar mein aisa roop na tha jis roop se din ki dhoop dabe,
Is shahar mein kya kya gori hai mahtab-rukhe gulnaar-labe..

Kuchh baat thi us ki baaton mein kuchh bhed the us ki chitwan mein,
Wahi bhed ki jot jagate hain kisi chahne waale ke man mein..

Use apna banane ki dhun mein hua aap hi aap se begana..

Is basti ke ek kooche mein ek 'Insha' naam ka deewana.!

Ba chanchal khel jawani ke na pyaar ki alhad ghaatein thin,
Bas raah mein un ka milna tha ya phone pe un ki baatein thin..

Is ishq pe hum bhi hanste the be-haasil sa be-haasil tha,
Ek zor bipharte saagar mein na kashti thi na saahil tha..

Jo baat thi in ke ji mein thi jo bhed tha yaksar an-jaana..

Is basti ke ek kooche mein ek 'Insha' naam ka deewana.!

Ek roz magar barkha-rut mein wo bhaadon thi ya saawan tha,
Deewaar pe beech samandar ke ye dekhne waalon ne dekha..

Mastana haath mein haath diye ye ek kagar par baithe the,
Yoon sham hui phir raat hui jab sailaani ghar laut gaye..

Kya raat thi wo ji chahta hai us raat pe likkheun afsana..

Is basti ke ek kooche mein ek 'Insha' naam ka deewana.!

Haan umr ka saath nibhane ke the ahd bahut paimaan bahut,
Wo jin pe bharosa karne mein kuchh sood nahin nuqsaan bahut..

Wo naar ye kah kar door hui 'majboori sajan majboori',
Ye wahshat se ranjoor hue aur ranjoori si ranjoori.?

Us roz humein maloom hua us shakhs ka mushkil samjhana..

Is basti ke ek kooche mein ek 'Insha' naam ka deewana.!

Go aag se chhaati jalti thi go aankh se dariya bahta tha,
Har ek se dukh nahin kahta tha chup rahta tha ghum sahta tha..

Nadaan hain wo jo chhedte hain is aalam mein na-daanon ko,
Us shakhs se ek jawaab mila sab apnon ko begaanon ko..

'Kuchh aur kaho to sunta hun is baab mein kuchh mat farmana'..

Is basti ke ek kooche mein ek 'Insha' naam ka deewana.!

Ab aage ka tahqeeq nahin go sunne ko hum sunte the,
Us naar ki jo jo baatein thin us naar ke jo jo qisse the..

Ek shaam jo us ko bulwaya kuchh samjhaya bechaare ne,
Us raat ye qissa paak kiya kuchh kha hi liya dukhyare ne..

Kya baat hui kis taur hui akhbaar se logon ne jaana..

Is basti ke ek kooche mein ek 'Insha' naam ka deewana.!

Har baat ki khoj to theek nahin tum hum ko kahani kahne do,
Us naar ka naam maqaam hai kya is baat pe parda rahne do..

Hum se bhi to sauda mumkin hai tum se bhi jafa ho sakti hai,
Ye apna bayaan ho sakta hai ye apni katha ho ho sakti hai..

Wo naar bhi aakhir pachhtaai, kis kaam ka aisa pachhtana.?

Is basti ke ek kooche mein ek 'Insha' naam ka deewana.!!

"Ibn E Insha"