Humara azm-e-safar kab kidhar ka ho jaaye,
Ye wo nahin jo kisi rahguzar ka ho jaaye..
Usi ko jeene ka haq hai jo is zamane mein,
Idhar ka lagta rahe aur udhar ka ho jaaye..
Khuli hawaon mein udna to us ki fitrat hai,
Parinda kyun kisi shaakh-e-shajar ka ho jaaye..
Main laakh chaahun magar ho to ye nahin sakta,
Ke tera chehra meri hi nazar ka ho jaaye..
Mera na hone se kya farq us ko padna hai,
Pata chale jo kisi kam-nazar ka ho jaaye..
'Waseem' subah ki tanhaai-e-safar socho,
Mushayera to chalo raat bhar ka ho jaaye.!!
"Waseem Barelwi"
No comments:
Post a Comment