Hum Ne Suna Tha Sahn-e-chaman Mein Kaif Ke Baadal Chhaye Hain

Hum ne suna tha sahn-e-chaman mein kaif ke baadal chhaye hain,

Hum bhi gaye the ji bahlane ashk baha kar aaye hain..

Phool khile to dil murjhaye shama jale to jaan jale,

Ek tumhaara ghum apna kar kitne ghum apnaye hain..

Ek sulagti yaad chamakta dard farozaa'n tanhaai,

Poochh na us ke shahar se hum kya kya saughatein laaye hain..

Soye hue jo dard the dil mein aansu ban kar bah nikle,

Raat sitaron ki chhaanw mein yaad wo kya kya aaye hain..

Aaye bhi suraj doob gaya be-noor ufuq ke saagar mein,

Aaj bhi phool chaman mein tujh ko bin dekhe murjhaye hain..

Ek qayamat ka sannata ek bala ki tareeki,

Un galiyon se door na hansta chaand na raushan saaye hain..

Pyaar ki boli bol na 'Jalib' is basti ke logon se,

Hum ne sukh ki kaliyaan kho kar dukh ke kaante paaye hain.!!

"Habeeb Jalib"