Wo Pahle Jaisi Wahshatein Wo Haal Hi Nahin Raha

Wo pahle jaisi wahshatein wo haal hi nahin raha,
Ke ab to shauq raahat-e-wisaal hi nahin raha,

Tamaam hasratein har ek sawaal dafn kar chuke,
Humare paas ab koi sawaal hi nahin raha,

Talaash-e-rizq mein ye shaam is tarah guzar gayi,
Koi hai apna muntazir khyaal hi nahin raha,

In aate jaate roz-o-shab ki gardishon ko dekh kar,
Kisi ke hijr ka koi malaal hi nahin raha,

Humara kya banega kuchh na kuchh to is pe sochte,
Magar kabhi humein ghum-e-ma'aal hi nahin raha,

Tumhaare khaal-o-khad pe ek kitaab likh rahe the hum,
Magar tumhaara husn be-misaal hi nahin raha,

Sanwaarta nikhaarta main kaise apne aap ko,
Tumhaare baad apna kuchh khyaal hi nahin raha,

Zara si baat se dilon mein itna farq aa gaya,
Taalluqaat ka to phir sawaal hi nahin raha.!!

"Aitebaar Sajid"
___
Ghum-e-ma'aal = sorrow of the result,