Wo nazar aaina-fitrat hi sahi,
Mujhe hairat hai to hairat hi sahi,
Zindagi daagh-e-mohabbat hi sahi,
Aap se door ki nisbat hi sahi,
Tum na chaaho to nahin kat sakti,
Ek lamhe ki masafat hi sahi,
Dil mohabbat ki ada chahta hai,
Ek aansu dam-e-rukhsat hi sahi,
Aab-e-haiwaan bhi nahin mujh pe haraam,
Zahar ki mujh ko zaroorat hi sahi,
Apni taqdeer mein sannata hai,
Ek hangame ki hasrat hi sahi,
Is qadar shor-e-tarab kya maani,
Jaagne ki mujhe aadat hi sahi,
Bazm-e-rindaa'n se ta'alluq kaisa,
Aap ki mez pe sharbat hi sahi,
Hadd-e-manzil hai muqarrar 'Baqi',
Rahraw-e-shauq ko ujlat hi sahi.!!
"Baqi Siddiqui"
__________
Aab-e-haiwaan = nectar, elixir,
No comments:
Post a Comment