Mufahamat Na Sikha Jabr-e-naraawa Se Mujhe

Mufahamat na sikha jabr-e-naraawa se mujhe,
Main sar-ba-kaf hun lada de kisi bala se mujhe,

Zabaan ne jism ka kuchh zahar to ugal daala,
Bahut sukoon mila talkhi-e-nawa se mujhe,

Racha hua hai badan mein abhi suroor-e-gunaah,
Abhi to khauf nahin aayega saza se mujhe,

Main khaak se hun mujhe khaak jazb kar legi,
Agarche saans mile umr bhar hawa se mujhe,

Ghiza isi mein meri main isi zameen ki ghiza,
Sada phir aati hai kyun parda-e-khala se mujhe,

Main ji raha hun abhi ai zameen-e-aadam'khor,
Abhi to dekh na tu itni ishtiha se mujhe,

Bikhar chuka hun main ab mujh ko mujtama kar le,
Tu ab samet bhi apni kisi sada se mujhe,

Main mar raha hun phir aaye sada-e-kun-fayakun,
Banaya jaaye mita ke phir ibtida se mujhe,

Main sar-ba-sajda hun ai 'shimr' mujh ko qatl bhi kar,
Rihaai de bhi ab is ahd-e-karbala se mujhe,

Main kuchh nahin hun to phir kyun mujhe banaya gaya,
Ye poochhne ki ijazat nahin khuda se mujhe,

Main reza reza badan ka utha raha hun 'Adim',
Wo tod hi to gaya apni iltija se mujhe..!!

"Adeem Hashmi"
___
Mufahamat = compromise,
Sar-ba-kaf = one who is willing to die,
Talkhi-e-nawa = bitterness of voice,
Parda-e-khala = veil/curtian of space,
Ishtiha = appetite, desire, hunger, lust,
Mujtama = To become collect or brought together in a congregation,
Sada-e-kun-fayakun = sound of "BE" and " Happened",