Itna To Dosti Ka Sila Dijiye Mujhe

Itna to dosti ka sila dijiye mujhe,
Apna samajh ke zahar pila dijiye mujhe..

Utthe na ta-ki aap ki jaanib nazar koi,
Jitni bhi tohmatein hain laga dijiye mujhe..

Kyun aap ki khushi ko mera ghum kare udaas,
Ek talkh haadsa hun bhula dijiye mujhe..

Sidq-o-safa ne mujh ko kiya hai bahut kharaab,
Makr-o-riya zaroor sikha dijiye mujhe..

Main aap ke qareeb hi hota hun har ghadi,
Mauqa kabhi pade to sada dijiye mujhe..

Har cheez dastiyaab hai bazaar mein 'Adam',
Jhoothi khushi khareed ke la dijiye mujhe.!!

"Abdul Hameed Adam"
__________

Sidq-o-safa = Truth and purity,
Makr-o-riya = decit and hypocrisy,