Fasl-e-gul Kab Luti Nahin Maloom

Fasl-e-gul kab luti nahin maloom,
Kab bahaar aai thi nahin maloom..

Hum bhatakte rahe andhere mein,
Raushni kab hui nahin maloom..

Kab wo guzre qareeb se dil ke,
Neend kab aa gayi nahin maloom..

Dard jab jab utha hua mahsoos,
Chot kab kab lagi nahin maloom..

Bebasi jis ki zeest ho us ko,
Zeest ki bebasi nahin maloom..

Naaz sajdon pe hai humein lekin,
Naazish-e-bandagi nahin maloom..

Apni haalat pe tere wahshi ko,
Kyun hansi aa gayi nahin maloom..

Hosh aaya to may-kada na raha,
Haye kis waqt pi nahin maloom..

Meri jaanib wo dekh kar bole,
Hai koi ajnabi nahin maloom..

Daur-e-haazir ki bazm mein 'Bekal',
Kaun hai aadmi nahin maloom.!!

"Bekal Utsahi"
__________

Naazish-e-bandagi = pampering of created beings,