Chehre Se Kab Ayaan Hai Mere Iztiraar Bhi

Chehre se kab ayaan hai mere iztiraar bhi,
Lekin main kar raha hun tera intizaar bhi..

Shayad tujhe ho dastaras apne wajood par,
Mujh ko to is nazar pe nahin ikhtiyaar bhi..

Milne lage hain ab to khushi ke libaas mein,
Ghum-ha-e-zindagi ka hai koi shumaar bhi..

Ho laakh khoob-ru koi apne ta'in magar,
Hota hai aks-o-aaine par inhisaar bhi..

Yakja hui hain husn ki sab us mein khoobiyan,
Chehre pe taazgi hai nazar mein khumaar bhi..

Lagta hai jaan-boojh ke aisa kiya gaya,
Tu ne banaai cheez koi payedaar bhi..

Mahzooz hum bhi honge jo fursat kahin mile,
Gulshan bhi hai gulaab bhi rang-e-bahaar bhi.!! 

"Fakhr Abbas"
__________

Iztiraar = helplessness, perturbation, agitation,
Dastaras = reach, access,
Ta'in = for, towards,
Inhisaar = reliance, dependance,
Payedaar = durable, permanent, firm, steady,
Mahzooz = delighted, pleased, happy,