Bas Is Qadar Hai Khulasa Meri Kahaani Ka

Bas is qadar hai khulasa meri kahaani ka,
Ke ban ke toot gaya ek habaab paani ka,

Mila hai saaqi to raushan hua hai ye mujh par,
Ke hazf tha koi tukda meri kahaani ka, 

Mujhe bhi chehre pe raunaq dikhaai deti hai,
Ye mo'ajaza hai tabeebo'n ki khush-bayani ka,

Hai dil mein ek hi khwahish wo doob jaane ki,
Koi shabaab koi husn hai rawaani ka,

Libaas-e-hashr mein kuchh ho to aur kya hoga,
Bujha sa ek chhanaka teri jawaani ka,

Karam ke rang nihayat ajeeb hote hain, 
Sitam bhi ek tareeqa hai mehrbaani ka,

'Adam' bahaar ke mausam ne khud-kushi kar li,
Khula jo rang kisi jism-e-arghawani ka.!!

"Abdul Hameed Adam"
__________

Hazf = cutting off a letter ora syllable of a word, dropping, omission,
Jism-e-arghawani = Blushing (purple) body,