Ahsaas-e-husn ban ke nazar mein sama gaye,
Go laakh door the wo magar paas aa gaye,
Ek raushni si dil mein thi wo bhi nahin rahi,
Wo kya gaye charagh-e-tamanna bujha gaye,
Dair o haram hai aur to haasil na kuchh hua,
Sajde ghuroor-e-ishq ki qeemat ghata gaye,
Tanha-rawi mein yoon to musibat thi har qadam,
Hum ahl-e-karwaan se to peechha chhuda gaye,
Kitna fareb-kaar hai ahsaas-e-bandagi,
Hum manzil-e-khudi se bahut door aa gaye,
Ulfat mein fikr-e-zeest nadamat ki baat thi,
Achchhe rahe jo jaan ki baazi laga gaye,
Jo haal un ka tha wo humin jaante hain 'Arsh'
Yoon wo humaari baat hansi mein uda gaye.!!
"Arsh Malsiyani"
No comments:
Post a Comment