Wafa Ho Kar, Jafa Ho Kar, Haya Ho Kar, Adaa Ho Kar

Wafa Ho Kar Jafa Ho Kar Haya Ho Kar Adaa Ho Kar,
Samaye Wo Mere Dil Main Nahi Maloom Kya Ho Kar...

Mera Kahna Yahi Hai Tu Na Rukhsat Ho Khafa Ho Kar,
Ab Agay Teri Marzi Jo Bhi Tera Mud'aa Ho, Kar...

Na Wo Mahfil Na Wo Saaqi Na Wo Saaghar Na Wo Baada,
Hamaari Zindagi Ab Rah Gai Hai Be-Maza Ho Kar...

Ma'aaz-Allah Ye Aalam Buto'n Ki Khud-Numaai Ka,
Ke Jaise Chaa Hi Jaayenge Khudaai Par Khuda Ho Kar...

Bahr Soorat Wo Dil Waalon Se Dil Ko Chheen Lete Hai,
Machal Kar, Muskura Kar, Roith Kar, Tan Kar Khafa Ho Kar...

Na Chhodo Saath Mera Hijr Ki Shab Doobte Taaro,
Na Phairo Mujh Se Yoon Aankhein Mere Ghum-Ashna Ho Kar...

Inhain Phir Kaun Jaanche Kaun Tole Ga Nigaahon Main,
Agar Kaante Rahein Gulshan Main Phoolon Se Juda Ho Kar...

Mere Dil Ne Haseeno Main Maze Loote Muhabbat Ke,
Kabhi Is Par Fida Ho Kar Kabhi Us Par Fida ho kar...

Jahaan Se Wo Humein Halki Si Ek Aawaaz Dete Hain,
Wahaan Hum Ja Pahunchte Hain Mohabbat Mein Hawa Ho Kar...

Sambhalein Apne Dil Ko Hum Ke Royein Apni Qismat Par, 
Chale Hain Ai Naseer-e-zaar, Wo Hum Se Khafa Ho Kar..!!

"Nasiruddin Nasir Gilani"