Mere Ashko'n Ne Kayi Aankho'n Mein Jal-thal Kar Diya

Mere ashko'n ne kayi aankho'n mein jal-thal kar diya,
Ek paagal ne bahut logo'n ko paagal kar diya...

Apni palko'n par saja kar mere aansu aap ne,
Raaste ki dhool ko aankho'n ka kaajal kar diya...

Main ne dil de kar use, ki thi wafa ki ibtida,
Us ne dhoka de ke ye qissa mukammal kar diya...

Ye hawaa'en kab nigaahein pher lein kis ko khabar,
Shohrato'n ka takht jab toota to paidal kar diya...

Dewtao'n aur khudao'n ki lagaai aag ne,
Dekhte hi dekhte basti ko jangal kar diya...

Zakhm ki soorat nazar aate hain chehron ke nuqoosh,
Hum ne aaino'n ko tahzeebo'n ka maqtal kar diya...

Shahar mein charcha hai aakhir aisi ladki kaun hai,
Jis ne achchhe-khaase ek shaair ko paagal kar diya.!!

"Rahat Indori"