Jo ye har-su falak manzar khade hain,
Na jaane kis ke pairon par khade hain,
Tula hai dhoop barsaane pe sooraj,
Shajar bhi chhatriyaan le kar khade hain,
Unhein naamo'n se main pahchanta hun,
Mere dushman mere andar khade hain,
Kisi din chaand nikla tha yahaan se,
Ujaale aaj tak chhat par khade hain,
Ujala sa hai kuchh kamre ke andar,
Zameen-o-aasmaan bahar khade hain.!!
"Rahat Indori"
No comments:
Post a Comment