Aaj Unhein Kuchh Is Tarah Ji Khol Kar Dekha Kiye

Aaj unhein kuchh is tarah ji khol kar dekha kiye,
Ek hi lamhe mein jaise umr-bhar dekha kiye...

Dil agar betaab hai dil ka muqaddar hai yahi,
Jis qadar thi hum ko taufeeq-e-nazar dekha kiye...

Khud-faroshana ada thi meri soorat dekhna,
Apne hi jalwe ba-andaaz-e-digar dekha kiye...

Na-shanaas-e-ghum faqat daad-e-hunar dete rahe,
Hum mata-e-ghum ko ruswa-e-hunar dekha kiye...

Dekhne ka ab ye aalam hai koi ho ya na ho,
Hum jidhar dekha kiye pahro'n udhar dekha kiye...

Husn ko dekha hai main ne husn ki khaatir 'Hafeez',
Warna sab apna hi meyaar-e-nazar dekha kiye..!!

"Hafeez Hoshiarpuri"
___
Ba-andaaz-e-digar = in a different style,
Meyaar-e-nazar = quality of perception, view point,