Na armaan ban ke aate hain na hasrat ban ke aate hain,
Shab-e-waada wo dil mein dard-e-furqat ban ke aate hain,
Pareshaan zulf munh utra hua mahjoob si aankhein,
Wo bazm-e-ghair se aashiq ki soorat ban ke aate hain,
Bane hain shaikh-sahib naql-e-majlis bazm-e-rindaa'n mein,
Jahaan tashreef le jaate hain hazrat ban ke aate hain,
Na rakhna hum se kuchh matlab ye pahli shart hai un ki,
Wo jis ke paas aate hain amaanat ban ke aate hain,
Sitam ki khwahishein 'Bekhud' ghazab ki aarzuein hain,
Jawaani ke ye din shayad musibat ban ke aate hain..!!
"Bekhud Dehlvi"
No comments:
Post a Comment