Kuch Der Humare Saath Raho

Kuch der humare saath raho , 

Kuch apne rang bikharne do ,
Kuch apni khushboo bikhraoo ,

Aur shereen shabnumi lehje mein ,
Koi naram mulaaim baat karo ,

Jis lamhe mein maujood hain hum ,
Ye lamha mauj hai saaghar ki ,

Tum is lamhe ke saath bahoo ,
Kuch der humare saath raho ,

Tareeekh ke jabr ki baat hai kya ,
Hum dono ki auqaat hai kya ,

Kuch roop ka sona daan karo ,
Khairaat apni muskaan karo ,

Hum jaise shaair logon ka ,
Jeena marna asaan karo ,

Sandal si bahein phailao ,
Kuch nazmein ghazlein de jaao,

Jo shayed baaqi reh jaayein ,
Phir do sau saal ke bad koi
Naqsh kamaal-e-fun kar de ,
Apni har por qalam kar de,

Aur raj kattaas ke patthar par ,
ik lok riwaayat naqsh kar de

Hum dono ko tamseel kare,
Aaina aks ba aks kare

Jis aks pe khushboo lehraaye ,
Jis naqsh pe titli raqs kare

Phir ek hazaar baras guzrein ,
Phir chaar hazaar baras guzrein,

Aasaar shinaasi ke mahir,
is daur ki jab tahqeeq Karein

Is rasmul khat ko pehchane,
is lamhe ki tasdeeq Karein

Ye lamha qaaim o daaim ho ,
Is lamhe ki sab komalta
us ehed-e-shayer tak pahunche ,
ye qissa aakhir tak pahunche

Kuch der humare saath raho

Koi kya jaane, lamha bhar mein,
ye lamha apne saath na ho

Kuch der humare saath raho..!!

By: Dr Kausar Mahmood