Dil-e-be'khabar Zara Hausla

Dil-e-be'khabar, zara hausla..

Nahi mustaqil koi marhala,

Koi aisa ghar bhi hai shahar mein, 

jahaan har makee'n ho mutma'een,
Koi aisa din bhi kahee'n pe hai, 

jisay khauf-e-aamad-e-shab nahi,
Ye jo gard baad-e-zamaa'n hai, 

ye azal se hai, koi ab nahi..

Dil-e-be'khabar, zara hausla ..

Nahi mustaqil koi marhala... 

Ye jo khaar hain tere paao'n mein, 

ye jo zakhm hain tere hath mein, 
Ye jo khwaab phirtay hain dar-ba-dar, 

ye jo baat uljhi hai baat mein, 
Ye jo log baithay hain ja-ba-ja, 

kisi an-banay se dayaar mein,
Sabhi ek jaise hain sar-giraa'n, 

gham-e-zindagi k fishaar mein, 
Ye saraab yunhi sadaa se hain, 

isi rahguzaar-e-hayaat mein,
Ye jo raat hai tere chaar soo, 

nahi sirf teri hi ghaat mein,

Dil-e-be'khabar, zara hausla..! 

Nahi mustaqil koi marhala... 

Tere saamnay wo kitaab hai, 

jo bikhar gayi ho warq warq, 
Humain apnay hissay k waqt mein, 

isay jodna hai sabaq sabaq, 
Hain ibaarat'ain zara mukhtalif, 

magar ek asl-e-sawaal hai, 
Jo samajh sako to ye zindagi, 

kisi haft-khwaa'n ki misaal hai, 

Dil-e-be khabar zara hausla, 

nahi mustaqil koi marhala.....

Kya ajab ke kal ko yaqeen banay, 

ye jo muztarab sa khyaal hai, 

Kisi raushni mein ho munqalib, 

kisi sarkhushi ka naqeeb ho, 
Ye jo shab-numa si hai be-dili, 

ye jo zard-roo sa malaal hai,

Dil-e-be'khabar, zara hausla ...

Nahi mustaqil koi marhala..!! 

amjad islam amjad 

______________________________