Barson Ke Ratjagon Ki Thakan Kha Gayi Mujhe

Barso'n ke ratjago'n ki thakan kha gayi mujhe,
Suraj nikal raha tha ke neend aa gayi mujhe..

Rakkhi na zindagi ne meri muflisi ki sharm,
Chaadar bana ke raah mein phaila gayi mujhe..

Main bik gaya tha baad mein be-sarfa jaan kar,
Duniya meri dukaan pe lauta gayi mujhe.. 

Dariya pe ek tanz samajhiye ke tishnagi,
Saahil ki sard ret mein dafna gayi mujhe.. 

Ai zindagi tamaam lahu rayegaa'n hua,
Kis dasht-e-be-sawaad mein barsa gayi mujhe..

Kaaghaz ka chaand rakh diya duniya ne haath mein,
Pahle safar ki raat hi raas aa gayi mujhe.. 

Kya cheez thi kisi ki ada-e-supurdagi,
Bheege badan ki aag mein nahla gayi mujhe..

'Qaisar' qalam ki aag ka ahsaan-mand hun,
Jab ungliyan jalin to ghazal aa gayi mujhe.!!

"Qaisar-ul-jafri"
__________

Be-sarfa = simple life, useless,
Dasht-e-be-sawaad = desert of ignorance,
Ada-e-supurdagi = style of submission,