Ai Jahaan Dekh Le

* Nazm *
__________

Ai jahaan dekh le kab se be-ghar hain hum,
Ab nikal aaye hain le ke apna alam...

Ye mahallaat ye oonche oonche makaan,
In ki buniyaad mein hai humara lahu..

Kal jo mehmaan the ghar ke maalik bane, 
Shaah bhi hai adu shaikh bhi hai adu..

Kab talak hum sahein ghaasibon ke sitam...

Ai jahaan dekh le kab se be-ghar hain hum,
Ab nikal aaye hain le ke apna alam...

Itna saada na ban tujh ko maloom hai,
Kaun ghere hue hai filisteen ko..

Aaj khul ke ye naara laga ai jahaan,
Qaatilo rahzano ye zameen chhorh do..

Hum ko ladna hai jab tak ke dam mein hai dam...

Ai jahaan dekh le kab se be-ghar hain hum,
Ab nikal aaye hain le ke apna alam.!!

"Habeeb Jalib"
__________

Ghaasibon = Intruders; invaders,