Uzr Aane Mein Bhi Hai Aur Bulate Bhi Nahin

Uzr aane mein bhi hai aur bulate bhi nahin,
Baais-e-tark-e-mulaqaat batate bhi nahin.!

Muntazir hain dam-e-rukhsat ki ye mar jaaye to jaayein,
Phir ye ahsaan ke hum chhod ke jaate bhi nahin.!

Sar uthao to sahi aankh milao to sahi,
Nashsha-e-may bhi nahin neend ke maate bhi nahin.!

Kya kaha phir to kaho hum nahin sunte teri,
Nahin sunte to hum aiso'n ko sunate bhi nahin.!

Khoob parda hai ke chilman se lage baithe hain,
Saaf chhupte bhi nahin saamne aate bhi nahin.!

Mujh se laaghar teri aankhon mein khatakte to rahe,
Tujh se naazuk meri nazro'n mein samate bhi nahin.!

Dekhte hi mujhe mahfil mein ye irshaad hua,
Kaun baitha hai use log uthate bhi nahin.!

Ho chuka qata ta'alluq to jafaaen kyun hon,
Jin ko matlab nahin rahta wo satate bhi nahin.!

Zeest se tang ho ai 'Dagh' to jeete kyun ho,
Jaan pyaari bhi nahin jaan se jaate bhi nahin.!!

"Dagh Dehlvi"
_______________

Uzr = excuse, apology, plea,
Maate = habits,
Laaghar = lean, thin, frail,
_____________________

عذر آنے میں بھی ہے اور بلاتے بھی نہیں
باعث ترک ملاقات بتاتے بھی نہیں..

منتظر ہیں دم رخصت کہ یہ مر جائے تو جائیں
پھر یہ احسان کہ ہم چھوڑ کے جاتے بھی نہیں..

سر اٹھاؤ تو سہی آنکھ ملاؤ تو سہی
نشۂ مے بھی نہیں نیند کے ماتے بھی نہیں.. 

کیا کہا پھر تو کہو ہم نہیں سنتے تیری
نہیں سنتے تو ہم ایسوں کو سناتے بھی نہیں.. 

خوب پردہ ہے کہ چلمن سے لگے بیٹھے ہیں
صاف چھپتے بھی نہیں سامنے آتے بھی نہیں..

مجھ سے لاغر تری آنکھوں میں کھٹکتے تو رہے
تجھ سے نازک مری نظروں میں سماتے بھی نہیں..

دیکھتے ہی مجھے محفل میں یہ ارشاد ہوا
کون بیٹھا ہے اسے لوگ اٹھاتے بھی نہیں..

ہو چکا قطع تعلق تو جفائیں کیوں ہوں
جن کو مطلب نہیں رہتا وہ ستاتے بھی نہیں..

زیست سے تنگ ہو اے داغؔ تو جیتے کیوں ہو
جان پیاری بھی نہیں جان سے جاتے بھی نہیں..