Sab Log Jidhar Wo Hain Udhar Dekh Rahe Hain

Sab log jidhar wo hain udhar dekh rahe hain..
Hum dekhne waalon ki nazar dekh rahe hain,

Tewar tere ai rashk-e-qamar dekh rahe hain..
Hum shaam se aasaar-e-sahar dekh rahe hain,

Mera dil-e-gum-gashta jo dhundha nahin milta..
Wo apna dahan apni kamar dekh rahe hain,

Koi to nikal aayega sarbaz-e-mohabbat..
Dil dekh rahe hain wo jigar dekh rahe hain,

Hai majma-e-aghyaar ke hangama-e-mahshar..
Kya sair mere deeda-e-tar dekh rahe hain, 

Ab ai nigah-e-shauq na rah jaaye tamanna..
Is waqt udhar se wo idhar dekh rahe hain,

Har-chand ke har roz ki ranjish hai qayamat..
Hum koi din us ko bhi magar dekh rahe hain,

Aamad hai kisi ki ke gaya koi idhar se..
Kyun sab taraf-e-rahguzar dekh rahe hain,

Takraar tajalli ne tere jalwe mein kyun ki..
Hairat-zada sab ahl-e-nazar dekh rahe hain..

Nairang hai ek ek tera deed ke qaabil..
Hum ai falak-e-shobada-gar dekh rahe hain,

Kab tak hai tumhaara sukhan-e-talKH gawara..
Is zahar mein kitna hai asar dekh rahe hain,

Kuchh dekh rahe hain dil-e-bismil ka tadapna..
Kuchh ghaur se qaatil ka hunar dekh rahe hain,

Ab tak to jo qismat ne dikhaya wahi dekha..
Aainda ho kya nafa o zarar dekh rahe hain..

Pahle to suna karte the aashiq ki musibat..
Ab aankh se wo aath pahar dekh rahe hain,

Kyun kufr hai deedar-e-sanam hazrat-e-waaiz..
Allah dikhata hai bashar dekh rahe hain,

Khat ghair ka padhte the jo toka to wo bole..
Akhbaar ka parcha hai khabar dekh rahe hain,

Padh padh ke wo dam karte hain kuchh haath par apne..
Hans hans ke mere zakhm-e-jigar dekh rahe hain,

Main 'Dagh' hun marta hun idhar dekhiye mujh ko..
Munh pher ke ye aap kidhar dekh rahe hain.!!

"Dagh Dehlvi"
_______________

Sarbaaz-e-mohabbat = resolute in love,
Sair = amusement, excursion, jaunt, recreation,
Tajalli = manifestation, splendour, brilliance,
Nairang = fascination, anything new or strange, magic,
Falak-e-shobada-gar = magician sky,
Zarar = ruin, damage, harm, injury,
____________________

سب لوگ جدھر وہ ہیں ادھر دیکھ رہے ہیں
ہم دیکھنے والوں کی نظر دیکھ رہے ہیں..

تیور ترے اے رشک قمر دیکھ رہے ہیں
ہم شام سے آثار سحر دیکھ رہے ہیں..

میرا دل گم گشتہ جو ڈھونڈا نہیں ملتا
وہ اپنا دہن اپنی کمر دیکھ رہے ہیں..

کوئی تو نکل آئے گا سر باز محبت
دل دیکھ رہے ہیں وہ جگر دیکھ رہے ہیں..

ہے مجمع اغیار کہ ہنگامۂ محشر
کیا سیر مرے دیدۂ تر دیکھ رہے ہیں..

اب اے نگہ شوق نہ رہ جائے تمنا
اس وقت ادھر سے وہ ادھر دیکھ رہے ہیں..

ہر چند کہ ہر روز کی رنجش ہے قیامت
ہم کوئی دن اس کو بھی مگر دیکھ رہے ہیں..

آمد ہے کسی کی کہ گیا کوئی ادھر سے
کیوں سب طرف راہ گزر دیکھ رہے ہیں..

تکرار تجلی نے ترے جلوے میں کیوں کی
حیرت زدہ سب اہل نظر دیکھ رہے ہیں..

نیرنگ ہے ایک ایک ترا دید کے قابل
ہم اے فلک شعبدہ گر دیکھ رہے ہیں..

کب تک ہے تمہارا سخن تلخ گوارا
اس زہر میں کتنا ہے اثر دیکھ رہے ہیں..

کچھ دیکھ رہے ہیں دل بسمل کا تڑپنا
کچھ غور سے قاتل کا ہنر دیکھ رہے ہیں..

اب تک تو جو قسمت نے دکھایا وہی دیکھا
آئندہ ہو کیا نفع و ضرر دیکھ رہے ہیں.. 

پہلے تو سنا کرتے تھے عاشق کی مصیبت
اب آنکھ سے وہ آٹھ پہر دیکھ رہے ہیں..

کیوں کفر ہے دیدار صنم حضرت واعظ
اللہ دکھاتا ہے بشر دیکھ رہے ہیں..

خط غیر کا پڑھتے تھے جو ٹوکا تو وہ بولے
اخبار کا پرچہ ہے خبر دیکھ رہے ہیں..

پڑھ پڑھ کے وہ دم کرتے ہیں کچھ ہاتھ پر اپنے
ہنس ہنس کے مرے زخم جگر دیکھ رہے ہیں..

میں داغؔ ہوں مرتا ہوں ادھر دیکھیے مجھ کو
منہ پھیر کے یہ آپ کدھر دیکھ رہے ہیں..